كنت بوصف لواحد مكان وافتكرت حاجة زريفة، كنت عايز اوصفله مكان يملا منه الولاعة الغاز بتاعته ام جنيه ونص، فقعدت أقوله: المحل في البيت اللي ورا اللي ورا البيت اللي ورا البيت اللي ورا البيت اللي ساكن فيه الواد عفتجي اللي ورا بيت نور اللي ورا بيت البنت لوزي بتاعة كلية الاثار ورا بيت وليد الحلاق، ورا الشارع السد اللي بيلعب فيه حوده وزيكو كورة شراب ورا مصنع اللبسة اللي وراه بحاجة بسيطة كهرمانة بتاع الفطير ورا سيد القصبجي ومولي البيتزجي، على الناصية اللي ورا قهوة أبو لبن ورا مستشفى اليوم الواحد، ورا بيت لبنى (زبزبة)...
وبعدين سكت لحظات، هي ليه سموها زبزبة؟؟ أكيد عشان يوم الزلزال نزلت شبه نيكيد في نص الشارع اللي ورا بيت الولا لؤي اللي وراه عم محمد بتاع العجل على ناصية كدة واخدة كيرف صغير ورا هيطة بتاع النت...
أما الواد هيطة ده عمل شوية فلوس!!، النت الوحيد في مصر اللي سمح ان الزبون يفك بلياردو في المحل، لأ والمكان مجهز كمان، فيه كابينة كدة العيال هدهد ونفتالين كانوا مقضينها بلياردو في التمانيات... الكابينة دي كات فيميه كده خفيف بس عالشارع، كنت ممكن تشوف منها البت اللي بيسموها نوجا، بت بس صايعة نيل ومش سهلة كدة برضه في التمانيات.. عندها واحدة صاحبتها ساكنة ورا العمارة البمبي الخنيقة الي ورا عمارة سكن الطالبات، وما أدراكا بقة السكن دة، أنا سمعت الواد كديانة العرس كان بايت فيه ليلتين، مش فاهم ازاي وبيعمل ايه.. تلاقيهم كانوا مركبين جوة دا حتى أشكالهم تبضن الحرمة..
معرفتش اوصفله
